最近正裝look頻頻出鏡，下午終于過大學城完成咗挑戰杯復賽嘅presentation同答辯，對于成個過程確實冇咩感覺，只係覺得評委有D擺烏龍，竟然拿住另外一team嘅proposal當咗係我地嘅來提問，好在比我地發現得早，答辯環節有幾個問題都幾tough，幸好我地都吹得下，耍下太極，大家推來推去，捱下時間，死未！

復賽之後相約辦公室一眾小花小草dinner，大家依然係咁lovely，當然大家都成熟咗唔少，TEM4要努力啦...

上圖係比賽完之後嘅合照（without奕璇姐），係咪發覺我好矮？其實係因爲我嘅teammates實在太高，而且仲有高踭鞋，搞到我頓時縮咗水，据粗略估計，我地team平均身高可以有170cm，忽略中間小妹妹的話可以拉到173，woal~~!!! 什麽世道...

...

爲期6日嘅東莞名家具展實習之旅終于結束完滿結束，尋晚最後一日閉館之後大隊隨即坐巴士返學校，正裝都冇時間換，雖然個個都攰到鬼咁，不過過程都係開心嘅，下面趁自己仲記得寫下呢幾日發生嘅嘢...

報警點實錄--go go go!!!

今次實習我主要嘅崗位係主館報警點，顧名思義，即係協助外國人報警。由於3F客流量好大，賊都特別多，特別係開幕首日，基本上場館裏面到處都係人，加上外國人防範意識唔高，所以原本我以爲會好得閑嘅報警點結果超級忙，每日都有唔少外國人過來報案，絕大部分係失竊案，而我就負責幫手問下口供，做下筆錄之類，有時候仲要親自去埋派出所。例如前兩日有個巴拿馬嘅女士唔見曬所有行李，包括3000美金、護照、機票、一部相機、兩部手機、三張信用卡，當時佢身無分文，哭住過來報警，之後因爲要去派出所寫遺失證明補辦護照，於是我生平第一次坐咗上警車，入咗派出所，全程幫佢辦手續。係報警點做嘢其實幾刺激，除咗可以幫到人，仲會睇倒好多其它嘢，例如你會見到一排賊綁住手蹲係報警點後面，又或者有客人認出個賊激動過度於是乎打佢一鍋，總之，呢個經理絕對難忘...

製證處--name card plz!!!

除咗報警點我另外一個最主要嘅蒲點就係overseas製證處，簡單來講即係做receptionist，問外商要名片，然後睇下佢係邊個國家，然後就係電腦打個証比佢，雖然有好多唔同國家嘅外商，不過呢個position其實講嘅來來去去都係果幾句英文，以下就係例牌對白：

第一句：Hello, Good morning Sir, May I have your business card, please?

第二句：Excuse me, which country are you from?

第三句：Please wait for a while.

第四句：Here is your badge, and here is a guide book for you.

第五句：Thank you/You are welcome. Have a nice day.

以上對白基本上可以應付絕大部分外商，如果間中遇到D語言不通嘅，又或者佢的而且確講緊“英文”，而你又的而且確聼唔明佢係咩口音嘅英文嘅時候，唯有指手畫腳加上body language，呢個世界冇話溝通唔倒嘅...

親愛的鰻魚飯!!!

日日辛苦為兩餐，而作爲支撐我地一日工作嘅精神同物質支柱就係一餐豐富嘅lunch。由於前幾日攤位翻譯係跟攤位員工一齊食，所以佢地嘅餐券就自然成爲我地嘅福利。其實一張員工餐券都算唔錯啦，自選四菜一湯仲有水果，而兩張餐券就可以換鰻魚飯，由呢個餐券數目對比大家都可以想象到鰻魚飯有幾正，於是每日我地最興奮嘅時刻自然就係lunch time...

搶劫supermarket!!!

今次實習大隊差不多50人，因爲早餐係由我地自行解決，所以每晚我地都要去超市入貨，一次購買50人份嘅早餐，於是乎，每晚大概9點鍾，附近超時就會出現三四個男人嘅身影，佢地會推住幾部購物車，去到牛奶、麵包、水果、餅乾等貨架進行大肆掠奪，造成此類貨架出現瞬間清空嘅奇觀，最後排隊比錢嘅時候，車上嘅50人份早餐除咗嚇親附近嘅顧客，仲會嚇親收銀員，唔知情嘅真係會以爲我地嚟搶嘢...

殺人UNO芭蕉樹!!!

辛苦工作一日返到酒店，買完早餐開完會寫完總結之後，我地嘅工作仲未停，難得成班人圍埋一齊梗係唔少得玩game，今期我地依然有好傳統嘅實習必玩遊戲 Killer，而且又帶入另外兩個game--UNO & 蒙娜麗莎芭蕉樹。雖然呢D都唔係咩新嘢，不過有人未玩過的話自然就算新，所以每晚我地各個酒店房間基本上都係充斥住“我覺得誰是兇手”“DRAW TWO”“麗莎”呢D聲音，當然仲有大家好喪嘅笑聲...

HAPPY END

...

由於小弟我好好彩咁入到3F(Famous Furniture Fair)第三round面試，根據要求要着正裝去參加interview，又由於之前比賽只係買咗襯衫，仲未有外套，所以今日同某人再次出動去購買裝備。

今日我地嘅首站係天河城，二站中華廣場，尾站正佳廣場（好明顯我哋呢個路綫係混吉嘅），結果最後都係去G2000搞掂曬身上所有裝備，不過呢個過程中我發現兩樣嘢，第一係原來男人買正裝比女人容易，我整個購買過程除開搭地鐵都係半個鈡，一take過就OK，反而某人行咗成個下晝都唔啱心水，最後乜都冇買；第二係男人買正裝比女人貴N多，今晚一個同樣要去面試嘅女同學同我講，佢下午用RMB1000買曬衫褲&高踭鞋，而且仲買多一套business casual，而我只係買咗一件套裝，一件襯衫，再加一條tie，打完八五折之後都仲要RMB1700，原來呢個世界唔單止女人錢好賺，男人錢同樣都好好賺。希望我聼日面試生生性性，對得住套正裝啦，食粥食飯就睇聼日啦，阿門...

WTTTC - World Team Table Tennis Championships

Alvin - Volunteer

冇錯，小弟我係第49屆世乒賽志願者，部門係Reception Department，服務于白雲國際會議中心貴賓接待處。今日係第一日做嘢，工作就係--等！等集合，等負責人來到，等上頭指示，等物資運輸，等任務分派，等崗位分配，等完之後仲係等，原來等待果然都係一種任務，而且係好難捱嘅任務，不過等嘅過程中我見到偉大的中國國家隊，見到張怡寧從電梯行出來，見到孔令煇係我不遠處行過，不過由於本人要保持中國大學生嘅氣質與矜持，我並冇沖上去影相同摞簽名。後來去咗廣州體育館，竟然遇到國家男隊係場内訓練，有馬琳，王皓，王勵勤，仲有肥咗嘅劉囯梁，於是乎個個變曬狂熱小粉絲，坐係隔離靜雞雞偷拍，當中仲比我影倒D疑似運動員不雅照片，更搞嘢嘅係，我無聊開手機blue tooth搜索咗下場内嘅signal，竟然發覺有個用戶叫“皓令天下”，當時場内除咗國家隊就係我地幾個志願者，所以我地一口咬定呢個用戶就係万人迷--王皓，不過由於我唔敢send個“中囯隊加油”嘅sms比佢，最終呢個疑問嘅答案都係不得而知。

上圖係 好高好瘦嘅 王勵勤 vs. 中年肥咗好多嘅 劉囯梁

...